27 лютага на базе ДУА “Сярэдняя школа “№ 2 г.Слоніма” прайшло пасяджэнне раённага вучэбна-метадычнага аб’яднання настаўнікаў беларускай мовы і літаратуры па тэме “Сучасныя вучэбныя заняткі па беларускай мове і літаратуры ў кантэксце фарміравання функцыянальнай граматнасці навучэнцаў”. Форма мерапрыемства – метадычны палілог.
Педагогам быў прапанаваны для прагляду адкрыты ўрок беларускай літаратуры ў 5 класе па тэме “Міхась Лынькоў. Васількі. Трагедыя Міколкі. Аўтарскі боль па загубленым маленстве”, які правяла настаўнік беларускай мовы і літаратуры першай кваліфікацыйнай катэгорыі Куляшова Наталля Аляксееўна. Настаўнік прадэманстравала магчымасці выкарыстання разнастайных прыёмаў і сродкаў па развіцці чытацкай граматнасці вучняў на кожным з этапаў урока.
Удзельнікі метадычнага аб’яднання разгледзелі тэарэтычныя пытанні па павышэнні якасці адукацыі праз фарміраванне функцыянальнай адукаванасці вучняў на ўроках беларускай мовы і літаратуры (настаўнік Амяльковіч Г.І), узгадалі вядомыя і даведаліся пра новыя прыёмы і сродкі развіцця чытацкай граматнасці як асноўнага кампанента функцыянальнай адукаванасці ў межах вучэбных прадметаў “Беларуская мова” і “Беларуская літаратура” (настаўнік Куляшова Н.А).
Настаўнік-метадыст Захарчук І.У. правяла з настаўнікамі метадычны каворкінг, прысвечаны развіццю кампетэнцый педагогаў у галіне функцыянальнай адукаванасці.Удзельнікі мелі магчымасць разгледзець “Мадэль сфарміраванасці педагагічных кампетэнцый”, прааналізаваць заданні, накіраваныя на фарміраванне чытацкай адукаванасці. Работа ў экспромт-групах дапамагла ўсвядоміць алгарытм распрацоўкі метапрадметных заданняў для вучняў.
Узаемны прафесійны палілог даў магчымасць кожнаму ўдзельніку пасяджэння ўдасканаліць уласныя прафесійныя кампетэнцыі.
